Urretxuko Txistulari Taldea

Santa Ageda bezperako koplak

2012-02-05T23:20:00.002+01:00

Santa Ageda bezpera dela eta Goiargik 25 urte baina gehiago daramatza Urretxu eta Zumarragako kaleak kantuz goxatzen.
Aurten, hotza bisitari gogorra izan dute, baina leporaino jantzi, eztarriak berotu eta neguko jai honi beste behin ere eutsi diote.
Urretxuko txistulariok Zumarragako Antzinako Amako lagunekin batera, kalejiran lagundu genien.

Eguneko prentsa berriak: Hitza, DV
Eguneko irudiak Gotzon Aranbururenak dira:

TXISTU ALARDEA IDIAZABALEN

2012-01-30T10:52:00.005+01:00

Urtero bezala, San Blas festen aitzakian Txistu Alardea antolatu zuen Idiazabalen bertako txistulari taldeak. Aurtengoan, kontzertu berezia prestatu zuten txistulariek, izan ere taldeko zuzendaria den Nazario Telleriari Txistulari Elkarteko zilarrezko domina ezarri zioten.

Ezkutuan antolatutako omenaldi xume bezain ederra eskaini zioten txistulariek eta gainontzeko herritarrek Nazariori. Omenaldiaren aitzakian, Nazariorekin txistua ikasi duten txistulari beteranoak bildu eta kalejiran sartu ziren Zelaa kiroldegian. Nazariok zuzentzen duen danborradaren hotsak ere bertan egon nahi izan zuten egun berezi horretan.

Ospakizun guztien artean ere, Idiazabalgo txistulariek eta Nazariok berak gure Jose Mari Lasa oroitzeko tartetxoa izan zuten eta lore sorta ederra eskaini ziguten. Txoko txiki honetatik eskerrak eman izandako detailearengatik eta nola ez, bejondeizula Nazario zilarrezko domina hori!

Eguneko berriak: DV,

Urtarrilaren 8ko kalejiraren argazkiak

2012-01-17T21:55:00.007+01:00

Joan zen urtarrilaren 8an egin genuen Jose Mari Lasa hil osteko lehenengo kalejira, goizeko 9etan, ohikoa dugun bezala. Lehenengoa izanda, guztiok geunden parte hartzera gonbidatuta: gazte, beterano, aktibo eta "desaktibatuak". Guztira, 40 lagun inguru elkartu ginen.

Hona hemen kalejira hartan Luis Angel Tellezek atera zizkigun argazki batzuk.

Maisu eta erreferentzia genuenari agur esaten

2012-01-12T10:55:00.006+01:00

Aste bete baino gehiago da Jose Mari Lasa hil zitzaigunetik. Eta lehendabiziko egunetako mugimenduak baretu direnean, bere txistulari bizitzari eta izaerari buruzko lerro batzuk idaztera ausartu naiz.

50. urteurreneko liburua prestatu behar genuela eta, 2010eko urtarrilaren 9an, elkarrizketa-tertulia luze bat izan nuen Jose Marirekin txistu taldearen sorreraz, iraganaz, orainaz eta etorkizunaz. Bere txistu ibilbidean izandako xehetasun batzuk ere orduan jakin nituen. Eta orain, joan denean, elkarrizketa hartako apunteak irakurrita, hainbat anekdota eta testigantza gogoratu ditut.

1967an hasi zen txistua ikasten Jose Mari Lasa. 15 urterekin, batxilergoa amaitu zuenean, alegia. “Etxean ez zidaten utzi lehenago hasten” esan zidan. Ume umetatik gustatu omen zitzaizkion txistulariak; beti ibiltzen omen zen haien atzetik erromerietan eta kalejiretan. Eta lehenago ere eskatu omen zien gurasoei ikasten hasteko, baina, aurrena ikasketak ziren haien etxean. Eta batxilergoa amaitu zuen arte ez omen zuen lortu txistua jotzen hasterik.

Santi Gutierrez izan zen bere irakaslea. Hark erakutsi zizkion lehenengo notak eta goxotasunez gogoratzen zuen. Irakasle aparta izan zela esaten zuen, pozik eta harro sentitzen baitzen bere ikasleak txistulari on eta maila altuagokoak ateratzen bazitzaizkion.

Jose Marik ez zuzen gogoratzen zehazki ze egunetan hasi zen txistua ikasten, baina bai ze egunetan jo zuen lehen kalejira: 1967ko Corpus Christi egunean. Santik, garai hartan, egun seinalatuetan debutatu arazten zituen ikasten ari ziren gazteak; Aste Santuetan, San Inazio egunean, Euskal Jaietan, Gabonetan… Eta Jose Mariri, Gorpuzti eguna tokatu zitzaion. Beraz, noski, Corpus Eguneko Zortzikoa izan zen ikasi zuen lehendabizikoetako pieza.

Eta ondoren, lanean irabazi zuen lehen dirua, bere lehenengo txistua erosteko erabili zuela ere gogoratzen zuen.

Hala hasi zen eta, laster, hain oparoa izan den kultur eta herrigintzako ibilbide luzeari ekin zion. Lehendabizi, Irrintzi dantza taldekoek, lagunak edota koadrilakoak haietako batzuk, txistularia behar zutela jakin zuen eta haiekin hasi zen. Txistulari taldeko beste hainbat kide ere ibili ziren Irrintzin, Jose Mariren bidez, harekin batera edo hura ordezkatuz.

Euskal Jaiak antolatzen ere aritu zen hainbat urtetan, Pello Areizaga lagunarekin batera. Eta San Juan bezperako suaren ekitaldia ere bere gain hartu zuen. 80ko hamarkadaren hasieran, berriz, zinegotzi izan zen Urretxuko udaletxean, eta administraziotik aritu zen herrigintzan.

Ordurako, gainera, dultzaina jotzen ere hasi zen eta Iratzarri taldea sortu zuen Roberto Lopezekin eta Juan Manuel Kerejetarekin batera. Urte hauetan hainbat gaztek ikasi dute dultzaina jotzen berarekin, Santik txistulariekin egindakoa errepikatuz. Eta talde polita osatzea lortu zuen. Harrobia ere badator atzetik, gainera.

Goi Argi abesbatzan ere aritu zen urte batzuez, eta geroago, festetako kantu afariaren sortzaileetako bat ere izan zen.

Beraz, txistularia, dultzainaria, euskaltzalea, kantaria eta kantuzalea, zinegotzia... Gauza asko egin zituen. Pentsa! Gitarra jotzen ere ikusi genuen txistulariok afari baten ostean, eta apur bat behintzat moldatzen zen!

Hori guztia egiteko denbora ateratzen zuen. Eta hartzen zituen konpromiso guztiei eusten zien: igandeetako kalejiretara ez zuen ia inoiz hutsik egin, beste herrietako kontzertuetara joateko beti prest egoten zen... Eta noski, hori Kutxan zeukan lanpostuari eutsiz eta, Anarekin ezkondu ostean, familia hazten zuen bitartean.

90eko hamarkadako lehen urtetan, berriz, Santa Anastasiatako kontzertuari buelta bat eman nahi izan zion, musika-tresna berriak txistuarekin nahasten probatu nahi izan zuen. Lehenengo dultzaina eta abesbatza sartzea proposatu zuen. Eta, urtetik urtera, beste zer edo zer berria probatzen zuen: gitarra, metalak, trikitixa, txalaparta, pianoa, biolina...

2010eko negu hartan izan genuen solasaldian, bera ez zegoela kontzertu hori prestatu eta koordinatzeko behar bezala prestatuta esaten zidan. Xabier Barriolak eta beste hainbat lagunek eskaintzen zioten laguntza ezin bestekotzat jotzen zuen horrelako kontzertua egiteko. Ez omen zeukan “horretarako adinako musika ikasketarik”. Azken aldian, partiturak ordenagailuan prestatzeko programa baten ikastaroa ere egin zuen, ilusio handiz gainera, bere burua zeregin horietarako “hobeto prestatzeko”.

Gauza asko egitera iristen bazen ere, oso gizon umila zen Jose Mari. Ez zuen jende aurrean onartzen berak egindako lanak daukan garrantzia. Beti besteei aitortzen zien meritu guztia. Jose Mariren iritziz, txistulari taldea 50 urte betetzera iritsi izana Santi Gutierrezen meritua zen. Eta taldeak iraun arazteko urte hauetan denetan egon den giro ona, berriz, Jostenka Larrañagaren eta Juan Manuel Kerejetaren meritua. Eta arrazoia zeukan. Baina berak ere gauza handiak egin zituen eta ez zitzaion gustatzen hori entzutea.

Horrez gainera, ideiak argi zituen gizona zen eta batzuetan “egosgogor” xamarra ere bai horiek defendatzerakoan. Ez zitzaion ezezkorik jasotzea batere gustatzen eta izaera horri esker lortzen zuen askotan gazteok mugi araztea.

Niri dagokidanez, bere ekimenez idatzi izan ditut Txistulari aldizkarirako berriak, aritu izan nintzen herri aldizkarian edota idatzi nuen 50. urteurrenerako liburua. “Egingo den neska! Nik lagunduko dinat eta egingo den” izan ziren bere hitzak, liburua idatzi behar nuela esan zidanean. Eta nola esan hari ezetz? Nik behintzat ez nuen ikasi.

Hori bai, liburua idazten lagunduko zidala esan zidan eta hala egin zuen. Dokumentazioa bilatu zuen, produkzio lana egin zuen, aspaldiko txistulariekin bildu ginen, idatzi nuen guztia gainbegiratu zuen eta kapitulu bat, bitxikeriena, berak idatzi zuen. Azken finean, bere laguntzarik gabe, liburu hura kaleratzea ezinezkoa izango zen.

Beraz, dagoen lekuan dagoela, eskerrak eman nahi dizkiot. Eskerrak, zen bezalakoa izateagatik eta, ezezkorik onartu gabe, lanean jartzen gintuelako. Berari esker, harro egoteko moduko gauza asko egin ditugulako. Eta aldi berean, zeregin horietan gure ondoan geneukalako beti, gertu, laguntzen. Ea orain, bera gabe, bide horretan jarraitzen asmatzen dugun.

Agurtzane Aramendi
Lizarriturri Urretxuko Txistulari Taldeko kidea

ALBISTE BILDUMA

2012-01-05T18:24:00.004+01:00

Amaraunean ere Jose Mari Lasaren heriotzak izanda du ohiartzuna. Jarraian, han hemenka argitaratutako albisteen bilduma jasotzen da.

2010eko ekainean, Ramon Esnaolaren omenezko diskoa argitaratu genuenean, Euskadi Irratian elkarrizketa luzea egin zioten Jose Mariri. Hemen, elkarrizketa horren zatitxo bat eskuratu dugu eta hemen duzue guztiontzat entzungai.

Jose Mari Lasaren hileta, Goierriko Hitzan

2012-01-05T10:15:00.002+01:00

Goierriko Hitzak, Jose Mari Lasaren hiletari buruzko artikulua publikatu berri du.

Hona hemen webera igo duten bideoa:

Urretxuko Txistularien izenean, MILA MILA ESKER bertaratu zinetenoi!

Jose Mari Lasaren txistulari ibilbidea, argazkitan

2012-01-03T23:23:00.022+01:00

Jose Mari joan zaigun honetan, txistua edo dultzaina joz ageri den bideoak eta argazkiak ari dira publikatzen han eta hemen. Gure blogean bere txistulari ibilbidea argazkitan laburbildu nahi izan dugu:

Juan Manuel Kerejeta eta Miguel Lasarekin batera, dantza sueltoko saio batean.

Iñaki Kerejeta eta biak, festetan giroa jarriaz.

Gasteizko Andre Maria Zuriaren jaietan.

Irrintzi dantza taldearekin 1976 inguruan. Kaixarranka egin zuten Euskal Jaietako karrozen desfilean.

90eko hamarkadaren hasieratik Santa Anastasiatako kontzertuko zuzendaria eta antolatzaile nagusia izan ohi zen.

Euskaltzale amorratua zen. Beti izan zuen argi umeek ez dutela euskara eskolan soilik ikasi behar. Beraz, ibili zen talde guztietan euskararen erabilera bultzatu zuen, ohiko hizkuntza bilakatuz.

Inauterietako kalejirara urtero mozorro ezberdin batekin azaltzen zen.

1997an, Oskorrirekin batera, Iparragirre etxera bueltan diskoa grabatu genuenean.

2011ko azaroaren 26an Urduñako kaleetan kalejira egiten. Jose Marirekin txistulariok egin genuen azken eskursioa izan zen hau. Amurrion eta Urduñan ibili ginen Santa Zezilia ospatzen. Eta ondoren, herrian bertan jarraitu genuen, afaria eta parranda eginez.

Jose Mari Lasa joan zaigu

2012-01-02T23:16:00.012+01:00

2012ak, hastearekin batera, kolpe izugarria eman digu Urretxuko txistularioi: Jose Mari Lasa hil zaigu gaur arratsaldean, ezustean. Inork espero ez zuen notizia izan da eta, oraindik, sinistea ere kosta egiten zaigu.

Azken hamarkada hauetan taldeko gidari eta zuzendari lanak egin ditu. Taldearen oinarri eta euskarria izan da. Egiten ditugun ekintzen antolatzaile nagusia eta taldeak aurrera egin zezan bultzada ematen zuena.

Hileta elizkizuna asteazkenean, urtarrilaren 4an, izango da 19:00etan, Urretxuko San Martin de Tours parrokian.

Txistuak egiten ikasten

2011-11-29T21:50:00.011+01:00

Gancedo familiaren tailerrean, Amurrion izan ginen Urretxuko txistulariok joan zen larunbatean, azaroaren 26an. Txistuak nola egiten diren ikasten aritu ginen. Santa Zezilia egunaren inguruan urtero egiten dugu txangoa. Aurten, Arabako mendebaldea ezagutu nahi izan dugu eta Gancedotarren tailerrera bisita egiteko probestu genuen eguna.

Eguna, Goiurin hasi genuen. Bertako ur jauzia eta arroila ikusi genituen eta hamaiketakoa egin genuen bertan.

Ondoren, Amurriora joan ginen, Gancedotarren txistu tailerra ikustera. Primeran hartu gintuzten Gancedotarrek eta egiten duten lanari eta sortzen dituzten txistuei buruzko azalpen ugari eman zizkiguten.

Egur mota ezberdinetakoak, plastikozkoak... material ezberdinetako txistu, txirula eta silboteak ikusi genituen.

Eta tornuarekin nola lan egiten duen ere erakutsi ziguten.

Txistuak nola egiten diren ikasi ondoren, berriz, Urduña ezagutzeko parada izan genuen. Han geneukan zain Joseba Larrieta txistulari urduñarra. Herria erakutsi zigun, Antiguako Amaren eliza adibidez. Eta kalejiran gurekin batera irten zen.

Ondoren, guztiok batera bazkaldu genuen bertako jatetxe batean. Eta gurean ohikoa denez, abestiak, bertsoak eta txistu doinuak nagusi izan ziren bazkalostean.

Eta gauean ere, elkarrekin afaldu ondoren, festak goizalderarte jarraitu zuen.

Hasi gara Santa Zezilia ospatzen!

2011-11-21T22:17:00.004+01:00

Azaroaren 22a izan ohi da Santa Zezilia eguna, baina Urretxuko txistulariak hasi gara dagoeneko ospatzen. Joan zen larunbatean, Urretxu eta Zumarragako beste hainbat musika-talderekin batera irten ginen kalera.

Urretxuko Lizarriturri taldekooi Zumarragako musika bandarekin, Zumarragako Antzinako Ama Txistulari taldekoekin eta Pagoetako zein jubilatuen abesbatzekin. Zumarragako kaleetan kalejira egin ondoren, Areizaga-Kalebarren plazan emanaldia egin genuen. Jarraian emanaldi horretako argazki batzuk:

Azaroa, emanaldiz betetako hilabetea

2011-11-11T22:26:00.005+01:00

Udazkena aurrera doa eta eguna gero eta motzagoa da, baina festa giroa ez da itzali Lizarriturri txistulari taldekoongan. Justu kontrakoa, parrandarako gogoa piztu egiten da azaroan, emanaldiz eta ospakizunez betetako hilabetea izan ohi baita.

Gaur, San Martin egunez, hasi ditugu kalejira bereziak. 19:00etan kalera irten dira hainbat txistulari Iparragirre Balerdi musika tailerrekoekin batera eta emanaldi berezia eskaini dute San Martin auzo inguruan, bertako eguna ospatzeko.

Eta San Martinen ondoren, Santa Zezilia etorriko zaigu, musikarien patroiaren eguna. Hurrengo larunbatean, azaroaren 19an, bi herriotako musika taldeak kaleetara irtengo dira. Batzuk Urretxuko kaleetan eta besteak Zumarragakoetan ibiliko gara eta 19:30en inguruan bian herrien artean dagoen Areizaga-Kalebarren plazan elkartuko gara denok hainbat pieza elkarrekin jotzeko.

Baina Santa Zezilia eguna hilaren 22an izaten da. Eta egun hori ospatzeko, kalejira egingo dugu noski. Ondoren gainera, txistularietako asko, beteranoak batik bat, afaltzeko elkartuko dira Etxe Azpi elkartean.

Hala ere, Santa Zeziliaren aitzakian egingo dugun ospakizun handiena azaroaren 26an izango da. Egun horretan eskursio bat egitekotan gara Amurrio eta Urduña inguruetara. Lehendabizi Gancedoren txistu tailerra ikustera joateko asmoa daukagu eta, ondoren, Urduña inguruan bazkalduko omen dugu. Gainera, Urretxura bueltatzen garenean jarraitzeko asmoa izango dugu, seguruenik eta afaria eta abestiz eta dantzaz jositako sobremesa izango dugu seguruenera, ohikoa den bezala.

Zorionak Ramon!!

2011-11-05T15:00:00.003+01:00

Joan zen asteazkenean, azaroaren 2an, 95 urte bete zituen Ramon Esnaolak. Eta Urretxuko txistulariok zorionak eta muxu handi handi bat eman nahi dizugu. Entzuteko arazoak baditu ere, bixkor eta argi daude oraindik ere bai Ramon bai haren emazte Jesusa. Ramonen urtebetetze egunean ere, beti bezain ongi hartu zituzten etxean Urretxuko txistularien ordezkariak.

Ramon Esnaola gutako askoren irakaslea izan da. Txistu taldea sortzekotan izan zenean, hainbat gaztetxori irakasten ibili zen. Eta ondoren, 80ko hamarkadan, musika eskolako irakasle izan zen gutako askorentzat.

Bestalde, gainera, hainbat fandango, arin-arin, zortziko eta biribilketa idatzi zituen. Eta Urretxuko txistularioi ekartzen zizkigun, probatu genitzan eta ezagutzera eman genitzan.

Beraz, irakasle izateaz gainera, Urretxuko txistularion lagun handia da Ramon Esnaola. Zorionak Ramon! Segi bixkor bixkor, orain arte bezala!

Urretxuko Txistulari Kontzertuko argazkiak

2011-10-24T22:36:00.003+02:00

Joan zen irailaren 17an, Santa Anastasia festetan, kontzertua egin genuen Urretxuko Txistulariok. Jarraian kontzertu honetako argazki batzuk dituzue.

Goian duela 50 urte sortu zuten Urretxu dantza taldeko kideak ditugu. Behean, berriz, Goi Argi abesbatzako kideak izan genituen lagun hainbat piezatan, urtero bezala.

Irrintzi taldeko mutilek Amaia operaren ezpatadantza egin zuten.

Lurra dantza taldeko lagunek arin arin eta fandangoa dantzatu zituzten eta koreografia berri bat eskaini ziguten.

Festetako kontzertuaren bideoa argitaratu du Otamotzek

2011-10-07T10:27:00.005+02:00

Aurreko testuan komentatu bezala, txistularien kontzertua izan ohi da lanik handiena ematen digun festetako ekitaldia. Otamotz aldizkariak kontzertu hori laburbiltzen duten bi bideo argitaratu ditu.

Aurten Lizarriturriren 75. urteurrena, Urretxu dantza taldearen sorreraren 50. urteurrena, Jesus Guridiren heriotzaren 50. urteurrena eta Xabier Leteren heriotza gogoratu genituen.

Hemen daukazue bi zatitan kontzertu horrek eman zuena.

Joan ziren Santa Anastasiak!

2011-09-27T22:09:00.007+02:00

Irailaren 22aren bueltan izaten dira Urretxuko jaiak, aurten 16tik 19ra bitartean, eta egun batzuk pasa badira ere, oraindik errekuperatu nahiean dabil bat baino gehiago. Txistularientzat ere gogorrak izaten dira egun horiek, edo gogorrak baino gehiago, ekitaldiz beteak... Izan ere, txistua hartu eta ekitaldiz ekitaldi ibiltzen gara, lotarako asti handirik hartu gabe.

Ostiral arratsaldean hasi ginen Iparragirre Balerdi musika tailerrekoekin kalejira eginez. Larunbat iluntzean, urtero bezala, kontzertua izan genuen. Igandean, berriz, goizean kalejira eta arratsaldean karrozen desfilean parte hartu genuen eta gehienok bezala, blai eginda amaitu genuen. Eta astelehenean gutako batzuk atseden hartu bagenuen ere, beste batzuk eguerdian hasi ziren txistuak astintzen eta hala jarraitu zuten kantu afaria amaitu arte.
Beraz, bai, maratoia izaten dela esan dezakegu.

Lanik eta urduritasunik handiena larunbateko txistu kontzertuak eragiten digu. Aurten lau gai landu nahi izan ditugu. Lehenengoa, Lizarriturri iturriak 75 urte bete dituela izan zen. Eta, noski, gure taldeak Lizarriturri izena hartu duenez, jorratu beharreko gaia zen hau. Baina Urretxu Dantza Taldea duela 50 urte sortu zela ere gogoratu genuen, eta baita Jesus Guridiren heriotzaren 50. urteurrena eta Xabier Leteren heriotza ere.

Lau gai horiek hartuta 14 piezaz osatutako errepertorio zabala eskaini genuen. Eguraldi txarraren eraginez kiroldegian egin genuen kotzertua baina, urtero bezala, erantzun oso ona jaso genuen eta harmailak erabat bete ziren.

Eta ohikoa denez, herritar ugari izan genuen lagun. Urretxu Dantza taldea sortu zuten gizonak (garai hartan gaztetxoak zirenak), dantzari jantziak berriz ere soinean hartu eta agurra eta ikurrin dantza eskaini zituzten. Une horretan emozioa gailendu zen eta txalo zaparrada handiena dantzari beterano hauek jaso zuten.

Horrez gainera, Irrintzi eta Lurra dantza taldekoak, Gorka Azkarate bertsolaria, Gorka Ojanguren Xabier Leteren abestiak kantatuz, Goiargi abesbatza, Xabier Barriola pianoan, Patxi Urrestarazu gitarran eta metal boskotea izan genituen lagun. Eta gainera, Aitor Goiak, Josu Perezek eta Carlos Mediavillak Euskal Herriko parajeen irudiez osatutako argazki sorta prestatu zuten kontzertuan zehar emateko. Urtero bezala, ESKERRIK ASKO, denoi zuen laguntzagatik.

Hau guztia amaituta, atseden hartu eta errekuperatzen saiatu gara eta gure ekintzak ohikora bueltatu dira: asteroko entsegu eta kalejiretara. Hurrengo zita igande goizean izango dugu, 9etan, Udaletxe aurrean.

Baina udazkena ere gauzez beteta izango dugu, eta laster Santa Zeziliatarako prestatzen ere hasi beharko dugu.

BLOG-A BERPIZTUZ

2011-09-03T11:54:00.003+02:00

Iazko urtea berezia izanik blog hau sortzea erabaki genuen, baina behin ospakizun guztiak amaituta, blog-ak apenas izan du albiste berririk. Horrek ez du esan nahi besoak gurutzatu ibili garenik!! Ezta gutxiago ere!!!

Urretxuko Santa Anastasia festak gainean ditugularen aitzakiarekin, blog hau berriro ere berpizten saiatuko gara. Edozein festetan gertatzen den bezala, txistulariak ia derrigorrezkoak gara eta Urretxuko festetan ere makina bat ekitalditan parte hartzen dugu. Horietako nagusiena, festetako larunbatean egiten den Txistularien Kontzertua. Hau prestatzeko ensaio bereziak izango ditugu, urtero bezala, egunero arratsaldeko 20:00etan Urretxuko Kultur Etxean.

Urretxuko Txistulari Taldeari buruzko liburua

2010-10-31T21:08:00.005+01:00

Irailetik kalean da "Urretxuko Txistulari Taldea.1960-2010" izenburua duen liburua. Liburu honek, 50 urteetaan taldeak bizitako pasarte desberdinak kontatzen ditu partaideen bizipenetatik abiatuz.

Liburuaren idazlea urte askotan txistulari eta taldekide izan den Agurtzane Aramendi da. Agurtzanek ikus-entzunezko komunikazioa ikasi zuen EHU-n eta artikulu ugari idatzi ditu Kaixo herri aldizkarian eta baita Txistulari aldizkarian ere. Egun EITBn dihardu lanean.

Hilabeteetako lana izan da Agurtzanerena: dokumentazioa, elkarrizketak eta bizipen desberdinak jasoz. Baina hilabete guzti hauetan Jose Mari Lasa taldekidea izan du bidelagun. Jose Marik duen artxiboari esker hainbat pasarte hobeto ezagutzeko aukera izango dugu. Liburuaren kapitulu bat ere Jose Marik berak idatzi du.

Liburuan parte hartu duten Amaia Aranburu kazetaria eta Koldo Argandoña Urretxuko udal artxibozainari ere eskerrak eman nahi diegu beren lanarengatik.

Aurkezpen ekitaldia, iraileko Txistu Asteko ospakizunen baitan burutu zen. Orduan jasotako kronika eta aurkezpen ekitaldia ikusgai daude ondorengo loturetan:

Diario Vasco-ko kronika
Otamotz.com ataritik jasotako bideoa:

Liburuarekin batera, taldearen historia jasotzen duen ikus-entzunezkoa lortu daiteke. Ikus-entzunezkoaren aurreneko minutuak eskuinaldean dagoen bideoan ikusgai daude. Liburua eta DVD-a 15€-ren truke lortu daiteke hurrengo saltokietan.

Aitxu liburudenda (Urretxu)
Aresti liburudenda (Zumarraga)
Graficas Legazpi liburudenda (Zumarraga)

Dena dela, liburua eta ikus-entzunezkoa eskuratu nahi izan ezkero eta Urretxu edo Zumarragaraino etortzerik ez baduzu, urretxukotxistulariak@gmail.com posta elektronikoa erabiliz, taldearekin zuzenean harremanetan jarri zaitezke eta hauek eskuratzeko modua azalduko genizuke.

Urteurrenaren ohiartzuna

2010-10-26T21:11:00.006+02:00

Gipuzkoako Foru Aldundiaren Euskara eta Kultura departamentuak bere ataria eraberritu du. www.gipuzkoankultura.net atariak itxura eta eduki berriak aurkezten ditu. Bertan, Gipuzkoa mailan antolatzen diren ekitaldi eta ekintza desberdinen berri ematen da.

Gure urteurrena ere hizpide izan da atari honetan eta iruzkin bat gehitu dute bertan kaleratu berri diren ikus-entzunezko eta liburua aipatuz. Gehiago ikusi nahi ezkero, hemen klikatzea besterik ez duzue.

Txistulari Alardea

2010-10-19T13:03:00.005+02:00

Urtero bezela, Santa Anastasia festen baitan, Urretxuko Txistulari Taldeak antolatuta txistu Alardea ospatu zen. Urretxuko txistulariekin batera inguruko herrietako txistulariak ere gerturatu ziren alardera. Baina txistu doinuaz gain, ohitura den bezala, herriko artista ugari bildu zen alardean parte hartzeko:

Inguruko herrietako txistulariak
Sekundino Esnaola Musika Eskola haur kantariak
Goiargi Abesbatza
Juan Luis Aranburu soinujolea
Patxi Urrestarazu gitarrajolea
Amaia Aranaga bibolinjolea
Iratzarri dultzainero taldea
Azpeitiko metal boskotea
Lurra eta Irrintzi dantza taldeak
Xabier Barriola eta Inma Albisua abeslariak
Santos Ormaetxea abeslaria
Gorka Ojanguren abeslaria
Jesus Mari Garralda eta Amaia Aranburu aurkezleak

Partaide guzti hauetaz gain, ikuskizunean zehar proiektatutako argazkien arduradunak Carlos Mediavilla, Josu Perez eta Aitor Goia izan ziren.

Jarraiean, Otamotz.com atarian Gotzon Aranburuk zintzilikatutako alardearen irudiak dituzue. Beste behin ere, eskertu otamotz-eko lagunei irudiengatik eta gainontzeko partehartzaile guztiei urtero gure deiari erantzuteagatik!!!

Ospakizunen ondoren, atsedena

2010-10-12T12:27:00.006+02:00

Urteurreneko ospakizunak eta Santa Anastasia festen ondoren, atseden txiki bat hartu dugu. Baina, hemen gaude berriro ere festek emandako guztiaren berri zehatza emateko asmoz.

Blog honetan bertan aipatu bezala, festak irailaren 17an hasi ziren. Txistulariok, ohitura den bezala, Iparragirre Balerdi Musika Tailerrarekin batera kalejira egin genuen. Aurtengoan, urte berezia izanik, ohi baino txistulari gehiago bildu ginen eta pertsona kopuruan, Musika Tailerreko partaide adina txistulari elkartu ginen ia!!!

Kalejira amaitzearekin bat, txistulariok udaletxeko balkoietara atera eta arratsaldeko 20:00etan gure pregoi berezia kantatzen hasi ginen. Segurako Alboradaren doinuaz, bertso bereziak kantatu genituen udaletxeko balkoitik. Gotzon Aranburuk jasotako bideo honetan ikusgai dago une hori hirugarren minututik aurrera.

Larunbatean, blog honetan iragarri bezala, urteroko txistu alardea ospatu genuen. Hotzari aurre eginez, Iparragirre plazan bildutako jendetzaren aurrean, ikuskizun berezia eskeini genuen inguruko herrietako txistularien laguntzaz eta herriko beste hainbat talde eta artistaren laguntzaz. Taldekideok, alardea probestu genuen taldeko hiru pertsona handiri omenaldi txiki bat egiteko. Jostenka Larrañaga, Juan Manuel Kerejeta eta Jose Mari Lasak, Urretxuko urrezko domina jaso zuten eta taldekide eta herritarren esker ona ere larunbat gau hartan. Gotzon Aranburu eta Otamotz.com atariari esker, une hartako irudiak hemen eskaintzeko aukera dugu:

Igandean, Euskal Jai eguna ospatu zen Urretxun. Orduan ere, txistulari kuadrila bildu ginen, bai goizeko kalejiran baita arratsaldeko karrozen desfilean ere. Lehengo, oraingo eta etorkizuneko txistulariak elkartu ginen arratsaldeko desfileko kalejiran, beste behin Urretxun txistuarekiko zaletasun handia erakutsiz. 1:57 minututik aurrera arratsaldeko kalejirako irudiak ikus daitezke hemen alboko bideoan.

Astelehenean, Kuadrilen eguna ospatu zen. Ohituraz, txistulariok, "atseden" hartzen dugu egun horretan. Jaiei amaiera ematen dion Kantu Afarian ordea, taldekide asko biltzen gara gure eztarriak uzten digun neurrian euskal kantu zahar eta berriak kantatzeko. Aurtengoan, Kantu Afariko lagunek prestatuako liburuxkan ordea, bazen abesti berezi bat: Pantxoa eta Peioren Jo Txistua. Avenida inguruan geunden txistulariok, bertako kioskora igo ginen horrelako abesti berezi bat kantatzeko (5:20 minututik aurrera ikusgai dago ondorengo bideoan).

Eta abesti eta musika artean, 2010eko Santa Anastasia jaiak agurtu genituen. Festa eta ospakizun asko izan genituen irailean. Atseden egun hauen ondoren, lanean jarri gara berriro ere eta pixkanaka-pixkanaka ekintza guzti hoien irudi eta berri zehatzagoa emango dizuegu blog honetatik. Beraz, adi egon datozen berriei!!

Txistularien Kontzertua

2010-09-16T09:15:00.004+02:00

Urtero bezela, Urretxuko Santa Anastasia festen baitan, larunbata honetan Txistu Kontzertua izango da. Aurten, taldearen 50. urteurrena izango da kontzertuaren ardatz nagusia. Baina, ohitura den bezala, Urretxuko Txistulariekin batera, partehartzaile zerrenda luzea izango da kontzertuan:

Inguruko herrietako txistulariak
Sekundino Esnaola Musika Eskola haur kantariak
Goiargi Abesbatza
Juan Luis Aranburu soinujolea
Patxi Urrestarazu gitarrajolea
Amaia Aranaga bibolinjolea
Iratzarri dultzainero taldea
Azpeitiko metal boskotea
Lurra eta Irrintzi dantza taldeak
Xabier Barriola eta Inma Albisua abeslariak
Santos Ormaetxea abeslaria
Gorka Ojanguren abeslaria
Miguel Lasa abeslaria

Partehartzaile guzti hauekin batera eskeiniko diren piezak hauek dira:

1. LA PALOMA	Sebastian Iradier - Mold. Xabier Zabala
2. KAÑOIETAN	Isidro Ansorena
3. AGUR DONIBANE	Luis Mariano - Mold. Ainhize Azpiazu
4. IZARREN HAUTSA	Mikel Laboa - Mold. Ainhize Azpiazu
5. BEIDAKAR	Ramón Esnaola Laskurain
6. ITURBE	Ramon Esnaola Laskurain
7. LE BASQUE	Mold. Jose Ignazio Ansorena
8. OTSAGIKO DANTZAK	Mold. Kepa de Miguel
9. BALDORBA	Benito Lertxundi - Mold. Ainhize Azpiazu
10. LAU TEILATU	Itoiz - Mold. Jose Miguel Laskurain
11. TXATXAMATXALINATXU	M. Urdangarin - Mold. U. Iraizoz
12. URRETXUKO GAZTEAK	Miguel Lasa
13. GERNIKAKO ARBOLA	J. M. Iparragirre

Baina guzti honetaz gain, sorpresak ere egongo dira kontzertuan zehar. Gogoratu, urtero bezala, 23:00tan Urretxuko Iparragirre plazan izango da kontzertua eta eguraldi txarra egin ezkero, Aldiri polikiroldegian izango da hitzordua.

Badator Santa Anastasi!!!

2010-09-14T12:43:00.011+02:00

Oraindik urteurreneko ospakizunetatik errekuperatzen gabiltzan honetan, Urretxuko festa nagusiak gainean ditugu jada!!! Urtero bezela, txistulariok ere partehartzaile zuzenak izango gara. Aurtengoan gainera, festen hasiera iragartzen duen pregoia ematea ere egokitu zaigu gure 50. urteurrena dela eta!!!

Horrela bada, ostiralean arratsaldeko 19:30etan Urretxuko Txistulari Taldeak, Iparragirre Balerdi Musika Tailerrarekin batera kalejira egingo du Urretxuko kaleetan. 20:30etarako guztiok plazan bilduta gaudela, udaletxeko bailkoitik eta txupinazoaren aurretik, pregoia izango da.

Larunbatean, hilak 18, ohitura den bezala Txistu Alardea izango da gaueko 23:00tan Iparragirre plazan. Urretxuko txistulariekin batera, inguruko herrietako txistulariak, Goiargi Abesbatza, Dantzariak eta beste hainbat musikari elkartzen dira oholtza gainean. Aurtengoan, kontzertu hau aprobetxatu nahi dugu Jose Mari Lasa, "Jostenka" Larrañaga eta Juan Manuel Kerejeta taldekideei Urretxuko urrezko domina ezarri ahal izateko. Ekainean Urretxuko Udalak taldeari egin zion harreran ezagutzera eman zen erabakia eta kontzertuan burutuko dugu ezarpena.

Igandean, Euskal Jaia ospatuko da eta goizean goiz hasiko gara lanean. 10:00etan Kalejira egingo dugu Urretxuko kaleetan zehar eta arratsaldean, 17:30etatik aurrera egingo den Karrozen desfilean ere parte hartuko dugu, urtero bezela. Ea kalejira honetan ere, larunbatean bezain beste txistulari elkartzen garen!!!!

Astelehenean, Kuadrilen eguna ospatuko da eta txistulariok programan ekintza ofizialik ez dugun arren, ziur txistu doinuak entzungai izango direla Urretxuko kaleetan. Urretxuko Santa Anastasia jaietako egitaraua hemen klikatuz aurkituko duzue osorik.

Zumarratarren doinuak Urretxun

2010-09-13T10:18:00.003+02:00

Larunbateko ospakizunetatik errekuperatzen hasi gabe geundenean, goizean goiz txistu doinuak berriro ere Urretxuko kaleetan entzungarri zauden igande goizean... Baina taldeko askoren buruetan zebilen galdera "Gaur kalejirarik ez egitekotan gelditu ginen, ala???" Hala zen bai, baina leihora eta balkoietara atera eta Urretxuko kaleetan zebiltzan txistularien aurpegiak ez ziren iganderokoak!!!! Aurpegi hauek igandero-igandero irtetzen dira bai, baina alboko herrian!!!

Txistulari eta lagun ditugun Zumarragako Antxinako Ama txistulari taldekoek opari ederra egin ziguten atzo goizean!!! Ezustean harrapatu gintuzten eta benetan erregalo berezia guretzat!!

ESKERRIK ASKO LAGUNOK!!!!

Urrezko ospakizuna

2010-09-12T18:21:00.016+02:00

Atzoko eguna ez du berehalakoan ahaztuko Urretxuko Txistulari Taldeak. 50 urte ez dira egunero betetzen eta horrelako data garrantzitsu baterako neurriko ospakizuna burutu genuen. Eguna, hildakoen aldeko taldekideei eskeinitako meza batekin hasi genuen Urretxuko San Martin de Tours parrokian. Don Pedro Salaberri apaiza izan zen mezaren gidaria. Don Pedro, urte askotan bizi izan zen Urretxun eta taldearen hasierako urteetan ere harreman estua izan zuen (irteera askotan ere parte hartu zuen!!!).

Urretxuko Txistulari Taldearen ezaugarrietako bat aipatu behar bada, kalejirak aipatu behar dira. Horregatik, atzoko egunean ezin zen kalejira bat falta!!! Atzokoa berezia izan zen ordea, 80 lagun elkartu ginen Urretxuko kaleetan txistu doinuak zabaltzeko. 50 urteetan zehar taldetik pasatako 80 lagun elkartu ginen, txistuari hautsa kendu eta biribilketa hotsak eguerdian jotzeko. Famili argazkia atera eta Iparragirre kaletik gora abiatu ginen guztiok. Bide ertzean bildutako urretxuarren txaloak jaso genituen eta hitzez azaltzen zaila den zirrara berezia sentitu genuen batek baino gehiagok.

Kalejiraren ondoren, euskaldunok ohitura dugun bezala, mahai inguruan eseri eta bazkari eder bat gozatzeko aukera izan genuen Urretxuko Ederrena pilotalekuan. Kalejiran bildutako lagun guztiez gain, taldeko lagun asko ere elkartu ziren bazkarian: Oñati, Legazpi, Idiazabal, Segura eta Zumarragako txistulari eta lagunak, abesbatza, dantzari eta bestelako musikari adiskideak... Guztira 140 lagun inguru elkartu ginen bertan.

Bazkalondoan, opari banaketa hasi zen. Bertaratutako bakoitzak urteurreneko pin eta giltzetarako ilabero bat jasotzeaz gain, aste honetan bertan aurkeztutako ikus-entzunezko eta libururen ale bat jaso zuten. Honekin batera, azken hilabeeotan jasotako argazki guztiak biltzen dituen DVD bat eskuratu zuten. Baina eman bakarrik ez, Urretxuko Txistulariok ere opariak jaso genituen atzokoan. Oñatitik etorritako Gotzon Osinaga txistulariak kuadro elegante bat oparitu zigun Oñatiko txistulari taldearen izenean eta nola ez, mikrofonora gerturatu eta Txikia abestia ere eskaini zigun. Zumarragako txistulari taldekoek ere, egun berezi honetarako koadro eta bertso eder askoa oparitu ziguten!!! Orain, lanak izango ditugu lokaleko paretetan merezi duten tokia topatzeko!!!

Bazkalondoan, ere txistu doinuak entzuteko aukera izan genuen. Kanturako hainbat pieza jo ondoren, beteranoak mikrofonoetara hurbildu eta festetako txistu alardean joko duten pieza eskaini ziguten. Roberto Lopez, Iratzarri dultzainero taldeko sortzaileetako bat eta txistulari taldeko lagun handiak, bere eskusoinua hartu eta dantzarako hainbat pieza eskaini zizkigun.

Bazkalondorena luze joan zen, baina parranda ez zen frontoiean bukatu, ez horixe!!! Kalejira inprobisatu batean, Urretxuko aldapako tabernak bisitatzen hasi ginen, beti ere txistu doinuekin eta kanturako gogoz!! Arkupez arkupe, musika eta kantu ezagunak abesten hasi genuen gaua. Hasi eta indarrak utzi bitartean, horrela jarraitu genuen guztiok. Batzurentzat erretiro ordua nahi baino lehenago iritsi zen, baina beste batzuentzat ordea gaua luzatu egin zen. Gaur goizean etzegoen kalejirarako despertadorea piztu beharrik eta!!!!

Datorren asteburuko festen atariko ederra izan zen atzoko eguna. Lagunarte giro jatorra izan genuen eta gutxienez, beste 50 urte gehiago iraun dezala txistulari taldeak Urretxun!!!

ZORIONAK GUZTIOI!!!!

Aurkezpen guztien ondoren, gaur kontzertua!!!

2010-09-10T14:03:00.005+02:00

Halaxe da bai, gaur arratsaldean Garikoitz Mendizabalen txistuak eta Xabier Zabalaren eskusoinuak musikaz jantziko dute gaurkoan Urretxuko Labeaga Aretoa. Aste guztian zehar txistua eta txistulariak gora eta behera aritu gara, baina oraindik ez dugu txistu doinuaz gozatzeko aukerarik izan!! Baina gaur aukera paregabea dugu horretarako!!!

Aski ezaguna da Garikoitz Mendizabal txistu munduan. Euskal Herriko Txistulari elkarteko lehendakaria izan da aurtengo martxorarte, hainbat diska kaleratuak ditu baita ere eta gaur egun Bilboko Udaleko Txistulari Bandako zuzendaria da zestoarra. Xabier Zabala soinujolea izango du gaurko kontzertuan bidelagun. Hitzordua, aipatu bezala, Labeaga Aretoan izango da gaurkoan ere, baina ordu aldaketa dago gaurkoan, 20:30etan izango da kontzertua.

Atzoko liburu aurkezpenari dagokionez, jende ugari bildu zuen ekitaldiak. Aurkezpen ekitaldian Koldo Argandoña, Urretxuko Udaleko artxibozaina, Jose Mari Lasa, taldeko zuzendariak eta liburuaren idazlea izan den Agurtzane Aramendik hartu zuten hitza eta aretoan bildutakoen aurrean liburuaren nondik norakoak azaldu zizkiguten. Datozen asteetan, blog honetan bertan izango duzue liburu honen informazio zehatzagoa.

Liburuaren aurkezpena

2010-09-09T09:23:00.004+02:00

Ostegun honetan, taldekide eta lagun den Agurtzane Aramendik idatzitako Urretxuko Txistulari Taldea. Agrupación de Txistularis de Urretxu 1960-2010 liburuaren aurkezpena izango da gaurko ekintza. Ekitaldia Urretxuko Udaletxeko Batzar areto nagusian egiteko aurreikusita bazegoen ere, bertako obrak medio, tokiz aldatu beharra izan da eta Aizpuruenea Kultur Etxean izango da arratsaldeko 20:00tan.

Agurtzane Aramendi EHUn Ikusentzunezko Komunikazioan lizentziatu zen eta gaur egun eitb.com interneteko atarian aritzen da lanean. Urretxuko txistulari taldeko partaide izan da urte luzez eta taldearen ekintza askotan aurkezle lanetan ere aritua izan da. Gaur aurkeztuko den liburua bere lehenengo publikazio luzea da.

Liburu hau, urteurreneko beste harribitxietako da atzo aurkeztutako ikus-entzunezkoarekin batera. Iazko maiatzetik abian jarritako proiektua da eta hilabete askotako lanaren emaitza gaur eskuartean edukitzeko aukera izango dugu. Taldearen argazkiak, dokumentuak, kontakizunak eta partaide berezien kontakizunak biltzen ditu lan honek.

Bestalde, aipatu atzo aurkeztutako ikus-entzunezkoak oso harrera ona izan zuela Labeaga aretoan bildutako lagun guztien artean. Ordu eta laurdeneko iraupena duen dokumentala ikusi ahal izan zen 4 atal desberdinetan banaturik: Lehenengoa eta zabalena, taldearen 50 urteetako nondik norakoak aurkezten ditu hainbat taldekideen kontakizunei esker. Taldearen historia ezagutzeaz gain, anekdota eta bizipen hoietatik, garai bakoitzean Urretxuko herrian zein giro bizi zen ezagutu daiteke.

Bigarren atala taldeko zuzendari izandako Santi Gutierrezi eskeinita dago. Santik taldea nola bizi zuen eta beretzat zein garrantzitsua izan zen kontatzen dute bere alaba eta lagunek. Hirugarren atalean, blog honetan askotan aipatutako Ramon Esnaolari buruzkoa da. Ramonek betidanik izan du taldearekin harreman estua eta hainabt lagunek Ramonek egindako lan hori kontatzen dute. Azkeneko atalak, herrian izandako bi artisau handiren irudia aurkezten digu: Jexux Segurola eta Inazio Barrio. Urretxu eta Zumarragako txistulariok zorte handia izan dugu bi artista hauen lana gertutik ezagutzeko aukera izan dugulako: Jexux-ek txistu asko egin zituen eta hauen afinazioa lantzen ere gogor saiatu zen. Inazio ordea, Urretxuko Txistulari Taldeko lehenengo atabalaria izateaz gain, atabal, danbolin eta bonbete ugari egin zituen bai talderako baita taldekideentzat ere.

Eta ospakizunekin aurrera goaz!!!

2010-09-08T14:06:00.009+02:00

Gaur, txistu asteko hirugarren eguna dugu eta hitzordua Labeaga aretoan izango da arratsaldeko 20:00tan. Aurreko ostiralean hemen bertan aurreratu bezala, taldearen historia jasotzen duen ikus-entzunezkoaren estreinaldia izango dugu gaur. Honen aurrerapena, testu honen eskubi aldean duzuen lehiatilan ikus daiteke. Taldetik pasatako 20 partaideei egindako elkarrizketekin kontatzen da taldearen historia.

Bestalde, aipatu atzo iluntzean Urretxuko Kultur Etxean Mikel Aranburu txistulari eta ikerlariaren hitzaldia izan genuela. Mikel Aranburu, besteak beste, Euskal Herriko Txistulari Elkateko Lehendakaria izandakoa da. Bitxikeria bezala, aipatu, Mikelen lehendakari garai horretan, gure zuzendaria izan zen Santi Gutierrezi elkarteko zilarrezko domina ematea adostu zela.

Mikelek txistua eta txistularion historia nondik nora joan den azaldu zuen bere hitzaldian. Hainbat kontu interesgarri izan zituen hizpide, baita Urretxuko txistularion historiari buruz!! Antza denez, Iruñako udalean San Ferminetan parte hartzen zuten musikari guztien erregistroa eramaten zen eta 1700 urte inguruan, danbolintero urretxuarren bat azaltzen omen da hango dokumentuetan. Beregandik ere jakin genuen, Antoine d'Abadie ilustratuak bultzatutako Lore Jokoetako txistulari txapelketa batean Urretxuko Txistulari Taldea garaile suertatu zela!!! Eta horrelako mila istorio gehiago!

Atzo erakusketa, gaur hitzaldia

2010-09-07T08:43:00.006+02:00

Bai, azkenean eguna iritsi da! Atzo eman genion hasiera gure urteurreneko ospakizun ekintza nagusienei!!! Arratsaldeko 7:30etan Urretxuko kaleetatik kalejira bat eginez hasi ziren 50. urteurreneko ospakizun ekintzak. Kaletik paseoan zebilen jendeak antzeman zuen bai, txistulariok zerbait ospatzen genbiltzala!!! Kalejira ordea, ohi baina laburragoa izan zen. Atzokoan Juan de Lizarazu areto parean izan zuen amaiera, izan ere arratsaldeko 8etatik aurrera taldearen historia jasotzen dituen erakusketa zabaldu zen.

Erakusketa, hilaren 20rarte zabalik dago arratsaldeko 17:30etatik 20:30etara. Ehundik gora argazki jarrita daude eta aretoko pareta batean taldeak azken hilabete hauetan bildutako argazki guztiak ere ikusi daitezke bertan jarritako proiektoreari esker.

Baina Txistu Astea hasi besterik ez da egin!!!! Gaur bigarren eguna dugu eta arratsaldeko 20:00tan Mikel Aranbururen hitzaldia izango dugu Aizpuruenea Kultur Etxean. Mikel Aranburu iruindarra txistularia da eta euskal folklorearen jarraitzaile. 1975az geroztik Iruñako Udal Txistulari Bandako kidea da eta hainbat liburu kaleratuak ditu txistua eta Euskal folklorearen inguruan. Gaurko hitzaldian ere, txistuak Euskal Herrian izan duen presentzia eta garrantziaz jardungo du.

Ospakizunak hastera doaz!!!!

2010-09-05T22:56:00.003+02:00

Data bereziak gerturatzen dabiltz Urretxuko Txistulari Taldearentzat. Aspalditik prestakizunetan gabiltza eta bihartik aurrera, gure urteurrenaren ospakizun astea ospatuko dugu. Hemen duzue aste honetarako prestatu dugun egitaraua. Astelehenetik larunbatera bitartean ekintza berezi bat antolatu dugu:

ASTELEHENEAN, Txistulari Taldeak Urretxun 50 urte erakusketaren irekiera. Juan de Lizarazu aretoan. Erakusketa, irailaren 20rarte zabalik egongo da egunero 17:30tatik 20:00tara bitartean.
ASTEARTEAN, Txistua Euskal Herrian mendez mende hitzaldia Mikel Aranburu txistulari nafarraren eskutik Aizpuruenea Kultur Etxean.
ASTEAZKENEAN, Urretxuko Txistulari Taldea. 1960-2010. ikus-entzunezkoaren estreinaldia Labeaga aretoan.
OSTEGUNEAN, Agurtzane Aramendik idatzitako Urretxuko Txistulari Taldea. 1960-2010. liburuaren aurkezpen ekitaldia Udaletxeko batzar areto nagusian.
OSTIRALEAN, Garikoitz Mendizabal eta Xabier Zabalaren txistu eta soinu kontzertua. Birtuosismoa eta sentimenduak, txistuaz bat eginik. Betikoa eta betirako.
LARUNBATEAN, taldearen ospakizun bereziak: meza, kalejira eta bazkaria.

Ekitaldi guztiak, ostiraleko kontzertua ezik arratsaldeko 20:00tan izango dira eta doainekoak dira.

Hemendik gonbitea luzatzen dizuegu gurekin batera 50 urteak ospatzera eta ekintzetan parte hartzera!!!

Txoko txiki honetatik ere saiatuko gara egunean eguneko ekitaldien berri ematen, gerturatu ezin zaretenok ospakizunen berri izan dezazuen.

Taldearen historiaren ikus-entzunezkoa kalean

2010-09-03T08:18:00.006+02:00

Hona hemen gure urteurreneko harri bitxietako bat!!! Taldearen historia jasotzen duen ikus-entzunezkoa labetik atera berri-berri dago eta hemen duzue aurrerapen txiki bat:

Proiektu honen gidari Ibon Garmendia taldekidea izan dugu, eta berekin batera herriko hainbat pertsonek lan egin dute: irudiak Alex Areizagarenak dira, post-produkzioaren arduraduna Maider Sudupe izan da, narratzaile lanetan aldiz, Josune Zarandona aritu da eta azala eta serigrafiaren diseinua, berriro ere, Ane Miren Ormazabalen ardurapean egon dira. Hemendik eskerrak eman nahi dizkiegu proiektu honetan eskeinitako pazientzia eta dedikazioarengatik.

Bide batez, eskerrak eman nahi dizkiegu ere muntaia honetarako materiala eskuratzen lagundu diguten guztioi: Urretxuko Udala, Ramon Esnaolaren etxekoak, Ignazio Barrioren etxekoak, ...

Ikus-entzunezko honen estreinaldia datorren asteazkenean, irailaren 8a, arratsaldeko 20:00tan Urretxuko Labeaga aretoan izango da.

50 urte iruditan

2010-08-31T09:21:00.002+02:00

Blog honetan aipatu bezala, irailaren 6tik 12ra bitartean TXISTU ASTEA ospatuko da Urretxun. Urretxuko Txistulari Taldeak, bere 50. urteurreneko ospakizunen baitan hainbat ekintza antolatu ditu aste horretan eta aste kultural honi hasiera emateko, Txistulari Taldeak Urretxun 50 urte izeneko erakusketa zabalduko da Irailaren 6an arratsaldeko 20:00tan Urretxuko Juan de Lizarazu aretoan.

Erakusketako ardatza, 50 urte hauetan zehar bildutako argazkien bilduma da. Hasierako urteetatik gaur egunerarteko argazkiak ikusi ahal izango dira: kalejirak, kontzertuak, egindako irteerak... Argazkien osagarri taldeak jasotako oroigarriak, instrumentuak, ikus-entzunezkoak, diskoak eta hainbat material desberdin ere ikusi ahal izango da.

Erakusketa irailaren 20rarte zabalik egongo da egunero arratsaldeko 17:30etatik 20:30tara.

Txistulariak festetako pregoilari

2010-08-27T09:50:00.006+02:00

Uztaila amaieran jakinarazi zigutenez, Urretxuko Jai Batzordeak gure taldea aukeratu du aurtengo Santa Anastasia jaietako pregoilari. Gure taldeari egokituko zaio beraz, festen hasiera iragartzea kainoiakadaren danbadaren aurretik.

Urretxuko Santa Anastasia jaiak, irailaren 17tik 20ra bitartean ospatuko dira eta irailaren 19an Euskal Jai eguna izango da. Urtero bezela, txistulariok hainbat ekitalditan parte hartuko dugu eta guretzat hain urte berezia izanik, hori ere gure ekitaldietan ere nabarituko da.

Behingoagatik, festen hasiera plazan txistua jotzen egon beharrean, Udaletxeko balkoietan egongo gara kanoiaren danbatekoa biziz!!!

Oporretatik bueltan

2010-08-23T10:15:00.007+02:00

Udako oporraldia amaitzear dagoen honetan, Urretxuko txistulariok ere lanera bueltan gatoz. 50. urteurreneko ekintzen prestakizunetan erabat murgilduta gaude jadanik. Irailaren 6tik 12ra bitartean TXISTU ASTEA ospatuko dugu Urretxun eta AGENDA txokoan, gure hitzorduen berri izan dezakezue. Datozen egunetan ere, blog honetan ekintzen xehetasun gehiago topatu ahal izango duzue.

Bestalde gogoratu, IRAILAren 11an gure urteurreneko festa nagusia izango dela. Aurretik ere aipatu dizuegun bezela, taldekide kopuru gehiena biltzea gustatuko litzaiguke egun horretan. Meza, kalejira eta bazkari eder bat prestatzen gabiltza. Bazkarian parte hartzeko izenematea irailaren 3a arte zabalik dago eta urretxukotxistulariak@gmail.com posta elektronikoa erabili daiteke horretarako.

Aipatu baita ere, kalejiran joko diren piezen partiturak blog honetan bertan eskuragarri daudela. Bateren batek txistuari hautsa kendu eta ensaiatzen hasi nahi ezkero hor du aukera!!! Abuztuaren 31an ere ensaio txiki bat egingo da Urretxuko Kultur Etxean errepaso txiki bat egiteko.

Datozen egunetan, TXISTU ASTEKO ekintzen berri zabalagoa emango dizuegu, beraz adi egon blog-ari!!!

Badator Iraila...

2010-07-14T23:38:00.004+02:00

Bai, bai... Oraindik uztailean egon arren, gure taldea dagoeneko bere ikusmira irailean jarrita dauka!! Izan ere, aurtengo iraila berezia da Urretxuko Txistulari taldearentzat.

1960ko irailaren 11 izan zen Urretxuko Txistulari Taldearen lehenengo kalejira eta data hori hartzen da taldeko sorreraren egun bezala. Honela, aurtengo irailaren 11an, 5o urte beteko ditu Urretxuko Txistulari Taldeak.

Horrelako data esanguratsua ospatzeko, hainbat ekintza prestatzen dihardu taldeak eta pixkanaka-pixkanaka blog honetan bertan bakoitzari buruzko informazio zabalagoa aurkitu ahal izango duzue (aurrerapen txiki bat blog honetako AGENDA atalean aurki daiteke). Baina orain, 50 urte hauetan zehar taldean ibilitako partaide guztiengana zabaldu nahi dugu gure mezua!!! Egun gutxiren buruan, hemen beheran aurki daitekeen gutuna izango duzue eskuartean.

Gutunean iraileko ekintzen berri ematen da, baina bereziki bi ekintza nabarmendu nahi genituzke: IRAILAREN 11ko OSPAKIZUNAK eta EUSKAL JAIA (irailaren 19an). Bi egun hauetan, ahalik eta taldekide gehien bildu nahi ditugu guztiok batera taldeko Urrezko Ezteiak ospatzeko, beraz animatu eta parte hartu!!!!

Kontutan hartzeko azken bi oharrak:

Irailaren 11an ospatuko den BAZKARIan parte hartu ahal izateko, izen-ematea zabalik dago irailaren 3ra arte eta gure posta elektroniko helbidea baliatu daiteke horretarako (urretxukotxistulariak@gmail.com).
Irailaren 11an eta Euskal Jai egunean egingo diren Kalejiretan parte hartzera animatu!!!! Bertan joko diren piezak ezagunak dira guztiontzat (Gora, Santa Cecilia eta Elizondo), beraz, kendu hautsa txistuari eta animatu putz pixkat egitera!!! 2 ensaio egingo dira kalejira hauek pixkat astintzeko: abuztuaren 31an eta irailaren 7an, 20:00tatik aurrera Kultur Etxean.

* Egun gutxiren buruan, kalejirarako biribilketak eskuragarri egongo dira blog honetan bertan.

Diskoaren salmenta puntuak

2010-07-10T15:18:00.001+02:00

Aurreko egunetan aipatu bezala, Ramon Esnaolaren musikak izeneko diskoa kaleratu du txistulari taldeak. Disko bikoitza da eta Ramonen 31 abesti biltzen dira bertan, hoietatik 24 Urretxuko baserri desberdinei eskeinitakoak dira.

Goierriko Hitza eta Diario Vasco egunkariek jaso duten bezala, diskoa 10 euroren truke eskuratu daiteke Urretxu eta Zumarragako saltoki ezberdinetan:

Aitxu liburudenda (Urretxu)
Graficas Legazpi liburudenda (Zumarraga)
Aresti liburudenda (Zumarraga)
Agirre okindegia (Urretxu)
Kakueta okindegia (Zumarraga)
Jai-Alai taberna (Urretxu)
Iburreta taberna (Zumarraga)

Hala ere, diskoa eskuratu nahi izan ezkero eta Urretxu edo Zumarragaraino etortzerik ez baduzu, urretxukotxistulariak@gmail.com posta elektronikoa erabiliz, taldearekin zuzenean harremanetan jarri zaitezke eta diskoa eskuratzeko modua azalduko genizuke.

Ignacio Barrio-k utzi gaitu

2010-07-08T23:37:00.000+02:00

Amarauneko txoko txiki honetatik, normalean gure taldeko ospakizunen berri ematen dugu. Gaurkoan ordea, berri triste batekin aurkitu gara. Gure taldekide eta lagun handi batek utzi gaitu: Ignacio Barrio atabalari eta artisauak utzi gaitu.

Ignaciok atabala jotzen urte asko eman ditu eta bere etxean sortutako danbolin eta atabalak ehunka konta daitezke. Bere kabuz ikasi zuen danborilak konpotzen eta txistulari eta atabalari askok izan dute berak sortutako instrumenturen bat eskuartean. 1995ean Euskal Herriko Txistulari Elkartearen zilarrezko domina jaso zuen egindako lan guztiaren eskertza bezala.

Hileta elizkizunak, Urretxuko San Martin de Tours elizan izango dira bihar, uztailak 9, arratsaldeko 19:00tan.

"Ramon Esnaolaren Musikak" diska kalean

2010-07-05T17:17:00.000+02:00

Blog honetan aurreratu bezala, Ekainaren 19an Ramon Esnaolaren musikak izenburua duen disko bikoitza aurkeztu genuen. Ekitaldia Santa Barbarako ermitan izan zen eta zitara Ramon eta bere emazteaz gain, senitarteko eta lagun ugari bildu ziren.

Diskoak 31 abesti biltzen ditu eta maiatzean zehar grabatua izan da Urretxuko Labeaga aretoan. ElCrack grabaketak-eko arduraduna den Borja Aranburu aritu da soinu teknikari bezela, Ane Miren Ormazabalek diskoaren kaxa eta barneko liburuxken diseinua gauzatu ditu eta bertan ikus daitezkeen argazki guztiak Carlos Mediavillarenak dira. Hiru lagun hauei egindako lana eta izandako pazientzia eskertu nahi diegu benetan.

Musikari dagokionez, Urretxuko Txistulariak jotako piezak dira diskoan bildutako pieza gehienak baina Ramonek, txisturako piezez gain, bandarako piezak ere idatzi ditu eta hoiek ere disko honetan jaso dira. Urretxuko Iparragirre Balerdi musika tailerrari Taller musical izeneko pieza eskeini zion eta musika tailerreko partaideek ere diskoan jasotzeko pieza hau grabatu dute. Legazpiko Musika Bandak eta Santikutz Abesbatzak grabaturiko abesti bat ere jasotzen da disko bikoitz honetan, Legazpiko ereserkia hain zuzen ere. Hauetaz gain, proiektu honetan bidelagun izan dugun Gorobel metal boskotea ere aipatu beharra dago. Beraien laguntzaz, txisturako hainbat pieza ere grabatu ditugu eta.

Aurkezpen ekitaldian, Jose Mari Lasak diskoaren xehetasun guztiak eman zituen. Diskoan biltzen diren 31 abestietatik 24k Urretxuko baserrien izena daramate. Hau dela eta, Urretxuko baserritarrei gonbidapen berezia egin zitzaien zitara agertu ahal izateko. Aurkezpenean zehar, Urretxuko Txistulariek diskoan bildutako hainbat pieza jo zituzten zuzenean. Ramon eta Jesusak ere hitza hartu zuten eta egindako lanarengatik eskerrak eman zituzten erabat hunkituta zeudelarik. Iñaki Zabala, Urretxuko alkateak ere zorion hitz batzuk izan zituen Ramon eta Urretxuko Txistularientzat.

Ekitaldia amaitzeko, ekitaldira gonbidatutako baserritar bakoitzari 3 diska eta beraien baserriaren izena zeraman partitura oparitu zitzaien oroigarri moduan.

Jarraian, ekitaldiaren informazio zabalagoa biltzen duten albisteen sorta irakur dezakezue eta emanaldiaren osorik ikusi ahal izateko Otamotz.com-eko lagunek eskegitako bideoan ere ikus daiteke.

San Juan, San Juan heldu da...

2010-06-23T09:31:00.000+02:00

Ekainak 23. San Juan egunaren bezpera. Ohitura den bezela, Euskal Herriko txoko askotan sua piztuko da gaur gauean udako solstizioari ongi etorria emateko. Urretxun ere, San Juan sua piztuko da gaur gauean Gernikako Arbola enparantzan. Ohitura den bezala, sorginak, kantuak eta dantzak izango dira suaren inguruan.

Urretxuko Txistulariontzat zerbait berezia badu gaurko gauak eta San Juan egunak berak. Horrela idatzi du gure taldekide den Ibon Garmendiak Uggassa Gidako azken alean. Hemen irakurri ditzazkezue bere hitzak.

Gure taldeko sortzailea izan zen Santi Gutierrezek gaurko egunean aldegin zuen. Dagoen tokian dagoela, ziur gaur ere, San Juan zortzikoaren doinua entzungo duela gauean eta hainbeste maite zuen Santa Barbarako erromerian begi bat ipinita izango duela bihar ere.

Diska aurkezpena LARUNBATEAN

2010-06-17T14:48:00.000+02:00

Aurreko asteetan aipatu bezela, urteurrenaren aitzakiarekin, aspalditik eskuartean izan dugun proiektua gauzatzera ausartu gara eta Ramon Esnaolak idatzitako piezak bilduko dituen diska grabatu dugu maiatzean zehar.

Datorren larunbatean, Ekainak 19, lan honen aurkezpen ekitaldia burutuko dugu eguerdiko 12:00etatik aurrera Santa Barbaran. Bertan, Ramon Esnaola bera izango dugu gure artean eta diskoan jasotako hainbat pieza entzuteko aukera izango da. Diskaren aurkezpena dela eta Ramoni buruzko artikulua argitaratu da Noticias de Gipuzkoa egunkarian. Hemen klikatuz, artikulua irakurri dezakezue. Herriko gainontzeko komunikabideetan ere, diskoaren aurkezpen ekitaldiari buruzko informazioa zabaldu da azken orduetan. Hemen duzue albiste zerrenda:

Hemendik ere gonbitea luzatzen dizuegu aurkezpen ekitaldi honetan izateko. Larunbaterarte!!!!

Urrezko harrera udaletxean

2010-06-14T14:47:00.000+02:00

Pasa den astelehenean, ekainaren 7an, Urretxuko udalak gure taldearen ibilbidea omendu nahi izan zuen. Horretarako pleno berezi bat deitu zuten deialdian puntu bakarra aurkeztuz: Urretxuko Txistulari taldearen ibilbidearen aitortza.

Taldekide, lagun eta senitarteko ugari bildu ziren Urretxuko Udaletxeko areto nagusian ekitaldia jarraitzeko asmoz. Urretxuko alkatearen ongi etorriaren ondoren, Gorka Garmendia kultur zinegotziak hartu zuen hitza eta 50 urte hauetan zehar Urretxuko Txistulari Taldeak egindako lana goraipatu zuen, bai herrian antolatutako ekitaldiekin baita herritik kanpo Urretxuren izena zabaltzen egindako lanagatik. Udalaren esker ona adierazteko, oroigarri bezela plaka bat oparitu zigun.

Baina aitortza honen ondoren, bestelako sorpresa txiki bat bizi izan genuen han bildutako guztiok. Momentua aprobetxatuz, taldeko hiru beteranoentzako errekonozimendu berezia eskatu nahi izan genuen taldean hain beterano ez garenok eta Udalari, Jostenka, Jose Mari Lasa eta Juan Manuel Kerejetarentzako Urretxuko urrezko domina eskatu genuen. Udalbatzako kideek aho batez onartu zuten eskaera. Beraientzat ere ezusteko eskaera izan zen hau eta harriduraz jaso zuten udalbatzaren erabakia eta zorion agurrak.

Nahiz eta astelehenean erabakia hartuta gelditu, dominaren ezarpena Urretxuko jaietan egingo da, urteroko txistu alardearen baitan egingo dugularik. Ekitaldia amaitu aurretik Jose Mari Lasak hartu zuen hitza eta taldeko sortzailea izan zen Santi Gutierrezen hitz batzuk ekarri zituen gogora.

Edozein ospakizunetan gertatzen den bezala, ekitaldi ofiziala amaitutakoan, luntx txiki bat izan genuen udaletxeko sarreran eta hori gutxi balitz, taldekide beteranoek prestatutako afari ederra dastatzeko aukera ere izan genuen.

Hurrengo egunean, ekitaldi txiki honek prentsan izandako ohiartzuna irakurri daiteke ondorengo esteken gainean klikatuz.

Aspaldiko kalejirarik jendetsuena

2010-06-03T12:11:00.000+02:00

Dakizuenez, Urretxuko txistulariok erabat murgilduta gaude gure urteurreneko ospakizunen antolaketan. Horren islada, pasa den igandeko kalejira jendetsua izan zen. Urretxuar askok galdetuko zioten bere buruari ea zein ospakizun zegoen egun horretan honelako kalejira jendetsua izateko. Baina aparteko ospakizunik ez zen izan igandean. Irailean kaleratuko den DVD-rako irudiak hartu ahal izateko egin genuen kalejira hau.

33 lagun bildu ginen goizeko 9tan Iparragirre plazan eta iganderoko ibilibidea osatu genuen. Hainbeste lagun biltzea sarritan gertatzen den gauza ez denez, aukera aprobetxatu eta Lizarriturriraino igo ginen guztiok. Gure taldeari izen ofiziala ematen dion iturriaren alboan argazkiak atera genituen eta galdutako indar guztiak berreskuratzeko Santa Barbaran geldialdia egin eta hamarretako ederra dastatu genuen.

Ramon Esnaolaren omenezko diska grabatzen

2010-05-27T11:46:00.000+02:00

Aspalditik bueltaka zebilen proiektu bati ekin diogu azken hilabeteotan. 50. urteurrenaren aitzakiarekin, Ramon Esnaola urretxuar musikagileak idatzitako obrak bilduko dituen diska ibili gara erabat murgilduta.

Guztira 30 bat abesti bilduko dituen KD bikoitza kaleratuko da ekainaren erdialdean. Bertan biribilketa doinuak nagusi badira ere, zortzikoak, fandangoak, arin-arin bat eta Ramonek bandarako idatzitako pare bat himno ere aurkitu ahal izango dira. Kuriositate moduan, aipatu txisturako idatzitako pieza gehienak Urretxuko baserrien izena dute izenburutzat.

Grabaketak Urretxuko Labeaga aretoan burutu dira Borja Aranburu teknikariaren (ElCrack grabaketak) laguntzaz. Urretxuko Txistulariekin batera, Gorobel metal boskoteko kideak eta Iparragirre Balerdi musika tailerrak ere parte hartu dute.

PRENTSA atal berria martxan

2010-05-23T15:10:00.001+02:00

Poliki-poliki gure txoko hau osatzen goaz eta gaur atal berri bat irekiko dugu gure blog honetan: PRENTSA atala. Blog-aren goikaldean PRENTSA link-aren gainean klikatuz atal honetara sartu zaitezke. Bertan, Urretxuko Txistulari Taldeari buruz eta gure 50. urteurrenaren inguruan biltzen ditugun albisteak jasotzen joango gara. Inguruko komunikabideetan kaleratutako albisteak jasoko ditugu blog-aren txoko honetan.

Albisteak PDF formatuan bakoitzak norbere ordenagailura jeitsi ditzake eta nahi izan ezkero, etxeko inprimagailura bidali daitezke albistea papelean irakurri ahal izateko.

Atalaren estreinu egun honetan, martxoan ospatutako Txistularien Batzarraren inguruan bildutako albisteak aurkitu ahal izango dira.

Datozen ekintzak...

2010-05-15T22:02:00.000+02:00

Aste Santu ondoren, Urretxuko Txistulari taldea urteurrena ospatzeko ekintzen antolakuntzan murgildu zen buru-belarri. Hain data berezia, modu berezian ospatuko du taldeak. Irailean bilduko dira ekintzarik nagusienak, baina ordurarte ekitaldi desberdinak ere izango dira.

San Juan aldera, Ramon Esnaola konpositore urretxuarrak idatzitako abestiak jasoko dituen musika CD-a aurkeztuko dute txistulariek. Maiatzaren hasieratik, diska honen grabaketan murgilduta daude taldekide batzuk eta poliki-poliki proiektuak aurrera darrai. Laster izango da eskuragarri blog honetan bertan CD honi buruzko informazio gehiago.

Baina diskoa irailean etorriko den guztiaren sarrera txiki bat besterik ez da izango. Ordurako Agurtzane Aramendi idazten dabilen liburua eta Ibon Garmendia, Alex Areizaga eta Maider Sudupek prestatzen diharduten DVD-a prest egongo dira. Aipatzekoa da, gehienak Urretxuko Txistulari taldean ibilitakoak direla eta gertutik ezagutzen dutela taldearen nondik norakoak.

Txistulariak KAIXO aldizkarian

2010-04-19T09:40:00.000+02:00

Urretxuko Udalak, hiru hilean behin (gutxi gora behera) KAIXO herri aldizkaria kaleratzen du. Azken alea, 100. alea izan da eta martxo bukaeran kaleratu zen. Ale berezia izanik, Noticias de Gipuzkoa egunkariko herri kronikan, KAIXO aldizkariari eskeinitako albistea irakurri daiteke: bere sorreraren nondik norakoak, ibilbidea... Kuriositatea baduzu, hemen duzu apirilaren 7an kaleratutako albistea: 100 aldiz "Kaixo"

Herri mailako gainontzeko hedabideetan bezala, KAIXOn ere, Urretxuko Txistulariei buruzko erreportaia jaso dute 50. urteurreneko aitzakia hartuta. Urretxun bizi ez bazara, zaila da aldizkaria formatu fisikoan jasotzea. Hala ere, aldizkaria modu digitalean deskargatzeko aukera badaukazu hemen klik eginda. Honela erreportaia zuzenean irakurri dezakezu. Zeinek esango luke KAIXOren lehenengo alea argitaratu zenean, ordenagailu bidez ere irakurri ahal izango zela!!!

Amaitzeko, amarauneko txoko txiki honetatik, KAIXOrekin modu batera edo bestera harremana izandako guztioi ZORIONAK esan nahi dizuegu. Beste horrenbeste ale kaleratzeko gogo eta ilusioarekin jarrai dezazuela aurrera!!!

Kalejiren oporraldia amaitu da

2010-04-13T09:45:00.000+02:00

Urretxuko Txistulari Taldearen ezaugarrietako bat iganderoko kalejirak dira. Azken asteotan ordea, ihauterietatik hain zuzen ere, igande goizetan ez da txistu soinurik entzun kaleetan zehar. Ohitura den bezala, Garizuma garaian Urretxun ez da kalejirarik jotzen eta txistulariok hainbeste desiatutako oporrak hartzen ditugu.

Baina Aste Santuetako oporraldiekin batera, beste oporraldi batzuk ere bukatzen dira eta pasa den igandetik, berriro ere kalejirak hasi dira. Igandero igandero, goizeko 9etan Iparragirre plazatik abiatu eta betiko ibilbidean zehar, zortzikoak eta biribilketak izango dira entzugai abuztuko oporrak iritsi bitartean.

Bertso Musikatuetako agerpena

2010-03-30T12:45:00.000+02:00

Pasa den astean blog honetan aurreratu bezela, Urretxuko Txistulariak aurten Martxoan Bertsoko bertso musikatuen ekitaldian parte hartu genuen pasa den larunbatean. GazteleKUa, beste behin ere, jendez gainezka izan zen bertsoen aitzakian antolatutako ikuskizunaz gozatu ahal izateko.

Mota guztietako doinuak entzun ahal izan ziren eta GazteleKUan. Txistulariok, nola ez, kalejiran egin genuen sarrera eta Alborada de Segura piezak uste baino jarraitzaile gehiago dituela konturatu ginen!!!! Hona hemen emanaldian jasotako irudiak:

Baina saioan zehar, gure taldeko artista ugari ere ibili ziren eszenatokian kantun eta dantzan. Ekitaldiko gainontzeko aktuazioak ikusi ahal izateko nahikoa duzue hemen klik egitea.

Bukatzeko, amarauneko ixkin txiki honetatik, Zumarraga Urretxuko Bertso Eskola zoriontzea besterik ez zaigu gelditzen, beste urte batez Martxoan Bertsoa ekimenak izandako arrakastarengatik eta egin duten lan guztiarengatik. Bejondeizuela kuadrila!!

Urteurrena OTAMOTZ-en!!!

2010-03-24T11:20:00.001+01:00

Pertsonaia famatuen pare, Urretxuko Txistulari Taldea ere aldizkari bateko portada da!!!!

Apirileko Otamotz Aldizkariaren azalak martxoaren 13ko Txistu Festako argazkietako bat dakar. Barnealdean, taldetik pasatako hainbat beteranoekin izandako elkarrizketarekin osatutako erreportaia zabala osatu dute.

Egun hauetan zehar etxez etxeko banaketa egiten dihardute, baina aldizkariaren webgunean jadanik zintzilik daude erreportaia bera eta hainbat argazki. Hemen klikatzea besterik ez duzue guztira zuzenean iritsi ahal izateko.

Martxoan Bertsoa!!!

2010-03-22T12:29:00.001+01:00

Badira 8 urte Zumarraga-Urretxuko Bertso Eskolak Martxoan Bertsoa ekimena martxan jarri zuela. Ordutik, herriko bertsolariek martxoan izaten dute beren abilezia erakusteko aukera paregabea eta bertsozaleek beren ahots eta errima paregabeak entzun ditzakete.

Martxoan Bertsoak arrakasta handia izan du hasierako urteetatik eta poliki-poliki haziz joan den ekimena izan da. Aurtengoan ere ekintza ugari prestatu dituzte bertso eskolako kideek martxoan zehar eta hilabetea bukatzearekin bat 8. edizioa ere bukatzear doa. Hala ere, bukaera indartsua aurreikusita dago asteburu honetarako (egitaraua ikusi).

Ostiraleko Final handiaren ondoren, larunbatean, GazteleKUan Bertso Musikatuen emanaldia izango da eta Urretxuko Txistulariak, aurreneko aldiz bertan parte hartuko dute. Zita, gaueko 23:00tan da eta ikuskizuna behar bezala ikusi nahi ezkero, kafea, kopa eta purua Gaztelekuan bertan hartzea da aukerarik onena!!!

Urteurreneko lehenengo urratsa gainditua!!!

2010-03-17T11:47:00.000+01:00

Pasa den asteburuan, Urretxuko Txistulari Taldearen urteurreneko lehenengo ekintzak ospatu genituen. Blog honetan iragarri bezala, ostiralean, martxoak 12, Donostiako Udal Txistulari bandaren kontzertua izan zen Labeaga aretoan.

Kontzertu borobila eman zuen Donostiako taldeak, estilo guztietako errepertorioa eskainiz: ganbara musikako piezekin hasi zuten kontzertua, sortu berriak diren piezak eta abesti herrikoiak ere entzuteko aukera izan genuen Labeagara hurbildu ginen entzuleak.

Aipatzekoa, II Bilduma pieza. Jose Inazio Ansorena eta Jagoba Astiazaran taldeko kideak, taulagainetik jeitsi eta publiko artean eskaini zuten pieza bi txorien elkarrizketa errepresentatuz.

Kontzertua amaitzeko, propina txiki bat eskaini zuten txistulariek eta Urretxun egonik, bi biribilketa esanguratsu eskaini zituzten: IRIMO eta URRETXU.

Martxoak 14ko Batzar Nagusia

Ekintzek, larunbatean jarraipena izan zuten Txistulari Elkartearen Batzar Orokorrarekin. Goizean goiz hasi ziren larunbateko ospakizunak Urretxuko Txistularien kalejira jendetsuarekin (31 txistulari elkartu ginen kalejira jotzen!). Kalejira bukatzearekin batera, Euskal Herri osotik etorritako txistulariak azaltzen hasi ziren Iparragirre plaza inguruan. Bertan egina genuen zita, guztiok elkartu eta hamarretakoa egiteko. Kultur Etxeko areto nagusia, jantoki inprobisatu bihurtu genuen eta indarrak hartu genituen goizari aurre egiteko.

Hamarretakoaren ondoren, kalejira ofiziala burutu genuen. Jostenka, taldeko beteranoa izaki, elkarteko ikurrina hartu eta guztien buru abiatu zen Goiko Kaletik kalejira zabalduz. Kalejira San Martin de Tours parrokiako atarian amaitu zen. Ohiko meza ospatu zen ondoren eta amaitutakoan, Alkate Soinua joaz Udaletxeraino abiatu ginen.

Ohorezko agurra dantzatu ondoren, Urretxuko Udaleko ordezkariek harrera ofiziala egin ziguten txistulari guztioi eta Garikoitz Mendizabal, elkarteko lehendakaria, eta Iñaki Zabala, Urretxuko alkateak, oroigarrien trukaketa burutu zuten. Urretxuko txistulari diren Maialen Akizu eta Edurne Plazaolak egun honetarako bereziki prestaturiko bertsoak abestu zituzten.

Harreraren ondoren, txistulari guztiak Labeaga aretora hurbildu ginen kalejira joaz. Bertan elkartearen batzarra ospatu zen. Batzarra hastean, Txistulari elkartearen zorion agurra eta koadro dotore bat jaso zuen Urretxuko Txistulari Taldeak (orain hura zintzilikatzeko tokia bilatu beharko dugu!).

Batzarra bukatu ondoren, elkarteko zilarrezko domina banaketa ekitaldia ospatu zen aretoan bertan. Javier Hernandez, Sabin Bikandi eta Txomin Agirregomezkorta txistulariek urteetan egindako lanaren esker ona jaso zuten ekitaldian.

Goiza bukatzeko, guztiak kalejiran Ederrena frontoiraino hurbildu ziren bazkaltzera. Bazkalondoan txistu emanaldiak, bertsoak eta kantuak izan ziren Bentazaharreko Mutiko Alaiak taldeak girotuta. Elkarteko bazkide guztiei ere Urretxuko oroigarri bat jaso zuten, 2007an grabaturiko Urretxuko Musikak CD bikoitza.

Eguna amaitzeko, Urretxuko txistulariek erromeria eskaini zuten Areizaga-Kalebarren plazan nahi izan zuen guztiak dantza zezan.

Ekintza guzti hauek jarraipen zabala izan dute komunikabideetan. Hona hemen bildutako albisteak:

Urretxuko Txistu Festaren EGITARAUA

2010-03-10T12:59:00.000+01:00

Azken egunetan aipatu bezela, larunbatean, martxoaren 13an, TXISTU FESTA izango da Urretxun. Goizean goiz hasita, hainbat ekintza izango dira Urretxuko kaleetan. Egun honetan Urretxuko txistulariez gain, Euskal Herri osotik etorritako txistulariak izango dira gure herrian, Euskal Herriko Txistulari Elkarteak bere urteroko batzar nagusia ospatuko du eta.

Batzar nagusiaren ondoren, Javier Hernandez Arsuaga, Sabin Bikandi Belandia eta Txomin Agirregomezkorta Perezi, Txistulari Elkartearen zilarrezko dominak ezarriko zaizkie txistu munduan egindako lanaren errekonozimendu gisa.

Hona hemen larunbaterako prestaturiko egitarau zabala:

8:30		Urretxuko txistulari taldearen kalejira, oraingo txistulariak eta beteranoen taldeak elkarrekin.
9:30		Euskal Herritik etorritako txistularien topaketa Iparragirre Plazan
10:15		Txistulari guztien kalejira Urretxuko kaleetan zehar
10:30		Meza San Martin de Tours elizan
11:15		Kalejira elizatik udaletxera
11:00		Agintarien ongi etorria Urretxuko udaletxean
12:00		Txistularien Batzar Nagusia Labeaga aretoan. Ekitaldi hau Txistulari Elkarteko bazkideentzako soilik izango da. Batzarraren gai zerrenda hemen klikatuz ikus daiteke.
13:00		Txistulari Elkarteko Zilarrezko dominen banaketa Javier Hernandez Arsuaga, Sabin Bikandi Belandia eta Txomin Agirregomezkorta Perezi. Ondoren, kontzertu txiki bat eskainiko da.
14:30		Bazkaria Ederrena pilotalekuan txistulari guztientzat. Bazkalondorena Bentazaharreko Mutiko Alaiak taldeak girotuko du
19:00		Erromeria Herrikoia Areizaga-Kalebarren plazan. Eusko Dantzari Ikasleak, Lurra eta Irrintzi taldeetako dantzariak eta nahi duen guztiak dantza egiteko aukera.

Donostiako Udaleko Txistulari Bandaren kontzertua

2010-03-09T15:18:00.000+01:00

Datorren ostiralean, martxoaren 12an, Donostiako Udaleko Txistulari Bandak Urretxun txistu kontzertua eskainiko du Urretxuko Txistularien 50. Urteurreneko ospakizunen baitan. Kontzertua Labeaga aretoan izango da, arratsaldeko 20:00tan.

Donostiako Udaleko Txistulari Taldea zortzi musikarik osatzen dute. Eginkizun ugari eta askotarikoak ditu: udalak eskatzen dituen mota guztietako ekitaldietan parte hartzen dute (protokolozko ongi etorri zeremoniak, inaugurazio ekitaldiak, ospakizunetako girotze lanak,...), igandeetako alboradak, jaiegunetako eguerdiko kontzertuak, Donostiako abesbatza eta dantza taldeekin elkarlana, ... Taldearen errepertorioa aberatsa eta kalitate handikoa da, doinu herrikoiak eta ganbara musika uztartzen dutelarik.

Taldeko zuzendaria den Jose Ignazio Ansorena Miner-ek zuzenduko du Urretxuko kontzertua eta bertan ondorengo obrak eskainiko dira:

1. DANSERYE	Tielman Susato* (XVI. m.)
2. BOSTGARREN TONUKO SONATA	Joakin Oxinaga* (1719-1789)
3. II BILDUMA (Zortzikoa-Minuetoa-Idiarena-Kontradantza)	Jose Ignazio Ansorena (1953- )
4. LESAKA	Urtzi Iraizoz (1983- )
5. IDURIAK	Jose Mª Gonzalez Bastida* (1908-1997)
6. TXORIAK (Urretxindorra-Zozoa-Txantxangorria-Kukua)	A. Hilario Olazaran* (1894-1973)
7. IPARRAGIRREREN HIRU KANTA	Jose Ignazio Ansorena
8. JOKATXOAK	Alex Iribar(1963- )

* Jose Ignazio Ansorenak moldatua

Berri gehiago ondorengo web orrialdeetan:

Txistulari web ataria
Donostiako Udaleko Txistulari Banda

Txistu Festa Urretxun

2010-03-08T16:42:00.000+01:00

Datorren larunbatean, Martxoak 13 eta urteurreneko ekitaldien barnean, Euskal Herriko Txistulari Elkarteak bere Batzar Nagusia ospatuko du Urretxun. Egun horren baitan hainbat ekitaldi antolatu dira.

Lehenengoa Donostiako Udaleko Txistulari taldearen kontzertua izango da, Martxoaren 12an ostirala, Labeaga aretoan arratsaldeko 20:00tan. Jose Ignazio Ansorena txistulari ezaguna izango da kontzertuko zuzendaria.

Hurrengo egunean, Martxoaren 13an, goizean goizetik izango dira txistu soinuak Urretxuko kaleetatik. Esan bezala, egun honetan Batzar Nagusia ospatuko da eta herriko txistulariekin batera, Euskal Herri osotik gerturatutako txistulariak ibiliko dira egunean zehar Urretxun.

Datozen egunetan, bi ekitaldi hauen berri gehiago izango dituzue hemen eskuragarri.

Urretxuko Txistulariak amaraunean

2010-03-02T20:02:00.000+01:00

Hauxe duzue Urretxuko Txistulari Taldearen blog-a. Urte berezia izango da 2010a taldearentzat, izan ere, gure sorreraren 50. urteurrena ospatuko dugu. Hain ospakizun berezia, modu berezian ospatuko dugu eta dagoeneko ekintza desberdinen antolaketan murgilduta gaude.

Pixkanaka-pixkanaka blog hau osatzen joango gara argazki eta informazio gehiagorekin. Baina hasteko, hemen duzue azken asteotan gure inguruan bildutako prentsa oharren bilduma:

Urretxuko txistulari taldearen historia

2009-01-01T10:27:00.001+01:00

Hemen doakizue Urretxuko txistulari taldearen historia azaltzen duen bideoa.

2 zatitan dago banatuta: